آه يا قلبي يانا يا موجوع
ياللى كل ليلة تقوم مفزوع
مش م العطش واللا قرصة جوع
آه يا قلبي تعبت كتير وبالقوى
من وش غشاش وتانى فهلوى
من هم رايح وهم تانى لسه بيستوى
آه يا قلبى لما البرئ يموت بدون جريمة
والجلاد يحس إنه كسب وفاز بالغنيمة
ونسى إن ربنا أخدته أخده شديدة أليمة
آه يا قلبي لما ناس ليل نهار شغالة
وناس تانية تروح تاكل من الزبالة
وغيرهم من دمنا ولحمنا عايشين عوالة
آه يا قلبى ع الجسد لما اتقسم نصين
والعدو قام واترسم ياكل منين
الشمال واللا االجنوب واللا اللى هنا تايهين
آه يا قلبي لما الغلبان بيتقهر
وضعيف الإيمان بيروح ينتحر
والسفيه والإمعة هو اللى بيتعرف وبيتشهر
آه يا قلبى لما صوت الحق يترعش
وصوت الباطل هو اللى يعلى وينتعش
كله نصب كله كذب كله غش ف غش
آه يا قلبى لما يعود الإسلام غريب
واللى ماسك عليه كأنه ماسك لهيب
لكنه صابر وعارف إن فرج ربه قريب
لكن يا قلبى لازم تغير حياتك
وتخلى دايما فى ايدك طوق نجاتك
إيمانك بربك وقرآنك وسنتك وصلاتك