أيه رأيكم مش كفاية كده أوي  من أمتى وأحنا قاعدين ومستنين ان السما تمطر علينا الدهب مستنين ضربة الحظ زي ما بيجي في الأفلام تلاقي البطل هبطت عليه ثروة من السما من خالته اللي في أمريكا ولا عمته اللي في أستراليا كلنا بنقول .. ولا بلاش كلنا أحسن يجي واحد يقولي لأ أنا ماقولتش كده ماشي يا عم مافيش مشاكل في ناس كتير مستنيه ومستنيه وهتفضل مستنيه أن الحظ يبتسم لها والدنيا تضحك لها وتديها من وسع  وشباب كتير أوي كل واحد مستني لما تيجي له وظيفة العمر وعروسة الأحلام كل واحد منهم راسم نفسه أنه هيستنى لما تيجه له الوظيفة الي بيحلم بها طيب خليك مستني !!!!

بجد يا جماعه لا زم نصحى كفايه أوي نوم الطبيعي أننا نام 8 ساعات يعني عارف ايه 8 ساعات يعني 1/3 عمرك بتقضيه في النوم ده الطبيعي لو عايش 60 سنه  هتلاقي 20 سنة نوم  ده الطبيعي شوف بقى الناس الي بتنام بال 12 ساعة وفي ناس بتنام 15 ساعه كفاية بجد قوم أصحى بقولها لكل شاب أتخرج ومستني الوظيفة الوظيفة عمرها ما هتيجي لك لحد عندك  

زي ما بيقولوا "لا تنظر السفينة  على الشاطيء بل أسبح تجاهها"

دور على وظيفة هتقول البطالة وناس كتير اتخرجت وملاقيتش شغل بس هاجي وأقولك بس في ناس لاقيت شغل صح ولا لأ؟ هتقول 20% مش مشكلة بس لاقيت يبقى بلاش ننظر للنص الفارغ من الكوب ننظر للنصف المليء دور ودور ودور وان شاء الله هتلاقي شغل مش لازم بالمواصفات اللي في دماغك تنازل شوية لحد ما تخد الخبرة ومع تلك الوظيفة اللي في نظرك ممكن تكون أقل مما في ذهنك خليك فيها وأنت فيها طور نفسك ذاكر وحدث نفسك أتعلم لغة جديده نمي نفسك في برامج وعلوم  الكومبيوتر وده بيفكرني بحكاية حكاه لنا محاضر تنمية بشرية هو بيعمل في شركة أجنبية وواحد متعين فيها وبيشتكي أن لازم يترقى ويخد مرتب أكبر راح قاله أنت عملت دراسات قالوه لأ قاله عملت تنمية لنفسك في اللغة أكتر وأكتر قاله لأ قاله طيب ليه عايز تكبر في المنصب وفي المرتب وأنت معملتش حاجه في المقابل  يبقى كده يا جماعة بدل ما نقعد نندب حظنا نقوم وننمي نفسنا وندور بجد ندور بالساعات نقدم مية مرة وألف مرة والفين لحد ما نلاقي شغل وأحب عن تجربة أقول لكم مش كل حاجه واسطة أنا عن نفسي عملت محاسب بالشركة التي أنا فيها عن طريق التقديم والبحث وما وقفتش على كده لأ بدأت في عمل الدراسات وحضور الكورسات لأني عايز أكبر وأكبر مش في العمر طبعااااً !!! هههههههه

لأ أكبر في المناصب و المرتب وربنا  يكرمنا جميعا إن شاء الله بجد لازم نصحى ونقوم ونواجه الحياة بشجاعة يالا خليك شجاع وابدأ من دلوقت وتذكر قوله تعالى

"إنا لا نضيع أجر من أحسن عملاً"